NEWS

NBI, imbestigahan ang pagpatay
kang P02 Banas

General Santos City-  Padayun pa karon nga giimbestigahan sa  National Bureau of Investigation-NBI ang kasong pagpamusil patay kay PO2 Danson R. Banas nga matud pa sa alegasyun sa iyang asawa ra usab nga pulis.
Nagtuo ang pamilyang Banas nga posibleng mas duna pay daku nga hinungdan sa kamatayon sa ilang kabanay ug dili lamang ang anggulong away sa magtiayon.
Kahibaluan nga dunay usa ka pulis ang mitumaw alang sa pag angkon nga siya matud pa ang naka pusil patay sa biktima. Usa ka PO1 Romanito Masiado ang nagpaila nga responsable sa maong panghitabo diin hangtud karon pakyas pa ang mga kapulisan sa pag tino sa motibo niini.
Sumala pa sa nakuhang taho sa ABANTE SOCSARGEN NEWS back to zero matud pa ang imbestigasyon sa NBI alang sa pag suta sa kamatuoran nga hangtud karon gihikaw lang gihapon sa pamilyang Banas. Nasayran nga nag negatibo sa gipahigayun nga paraffin test ug ballistic test ang duha ka mga suspetsado. Sagad nga naka palibog gayud sa imbestigasyon sa kapulisan.
Samtang gilubong na sa pamilyang Banas ang ilang mahal sa kinabuhi niadtong naka labay'ng Sabado  gikan sa Collado Funeral Homes padulong sa Camp Fermin G. Lira, Jr., diin gipasidunggan kini pinaagi sa “21 gun salute” ug diretso nang gidala sa Monte Cielo Eternal Garden sa Barangay Mabuhay. 
Sa laing bahin gibutyag usab ni  Police S/Insp. Hoover Antonio, hepe sa Bula Police station nga magdepende pa sa mahimong resulta sa ilang imbestigasyon ang dagan sa kaso ni PO2 Banas diin padayon pa gihapong naka kustudiya sa ilang buhatan silang PO1 Rowena Banas ingon man si PO1 Romanito Masiado.
(Bonie Santillan)

State of Calamity ,gideklara sa
Calumpang-Kap. Salubre

Mideklara ug State of Calamity ang Brgy. Calumpang kaniadtong milabay nga semana  tungod sa sunog nga natigayun sa may Lower Puting Bato,Calumpang. Gikabutyag ni Brgy. Capt. Reynaldo “Loloy” Salubre  kung hain magahin kini ug kapil sa  P500,000 alang sa mga apektadong mga pamilya. Samtang pagatun- an pa sa Local nga panggamhanan sa Gensan ang mamahimong ayuda alang sa mga nahisgutang pamilya. 
Mukabat sa P2 Milyon ka pesos ang nahimung damyos sa  maong  sunog  kung hain mukabat usab sa 200 ka mga pamilya ang namakwit sa Acharon Sports Complex. Matud pa ni F02 Allan Rey S. Emperio imbestigador sa Bureu of Fire  Protection nga naugdaw gayod ang mga panimalay sa mga nabiktima sa kapin oras nga pagpalong sa halapad nga kalayo migula sa ilang pagsusi  nga nagdagkot ug   kandila ang panimalay mismo ni Leonora Maliorca nga  mauy usa sa hinungdan nga nakalas ang kinabuhi samtang samaron ang apo niining si Micheal Dela Cruz nga usa rag gipuy an. Kahinum duman nga gawas sa BFP, tulo ka Fire Trucks ang mialayon sa pagpalong sa maong sunog una ang Bombero sa RD nga gipanag iyahan sa pamilyang Rivera, KCC, ug Fil-Chinese Chamber Fire Volunteer ang mirespondi sa maong sunog.
(Jomar Plasabas) 

2 ka mga sundalong namatay
sa Basilan, gilubong na!

General Santos City-  Gilubong na ang duha ka mga sundalo nga namatay human sa panag-engkwentro didto sa Alabarka, Basilan niadtong mga nakalabay nga semana. Masulob-on ang pamilyang Sta. Rita ug Magno atol sa lubong sa ilang hinigugma sa kinabuhi. Ang mga bayani nailhan sa pangalang Sargeant Ronald Sta. Rita ug Private First Class Jordan M. Magno kung asa kaniadtong miaging semana Oktubre 23 sakay sa Cebu Pacific ang patay'ng lawas sa duha ka sundalo nga miabot sa General Santos International Airport. Gitagbo sa usa ka military honor ang duha ka sundalo isip pag-ila sa ilahang kabayanihan. Nanawagan usab ang pamilya sa duha ka sundalo ug hustisya tungod sa nahitabo sa Basilan. Samtang, gisiguro usab sa 10th Infantry Division sa Phil. Army nga makadawat ug hinabang  gikan kanila ang pamilya sa mga namatay. Sigon pa ni Lt. Col. Lyndon Paniza, tigpamaba sa 10th ID nga makadawat ug benepisyo ang mga beneficiaries sa mga nahisgutang, “The President's Social Funds will provide cash support amounting to PhP 250,000 for those Killed in Action (KIA) while those who were Wounded in Action (WIA) will receive PhP 100,000 for major injuries and PhP 50,000 for those with minor injuries.” Makadawat usab ug benipesyo gikan sa Special Forces Regiment-Army ang pamilya nilang Sta. Rita ug Magno nga adunay kantidad nga P10,000.00 ug uban pa susama sa pension, house and lot, full scholarship sa mga dependents gikan sa AFP Educational Benefits System Office.
(Rhea M. Dela Cruz)

1^st PRO 12-Media Fellowship masadyaon!

Masadyaon nga nahuman nga gipahigayon ang  Police Regional Office (PRO) 12 ug Media Fellowship niadtong Oktubre 28 sa Golden State HRM Laboratory.  Mukabat sa dul-an 400 katao ang mitambong sa maong okasyon lakip na ang mga kapulisan ug mga magsisibya sa Sarangani, Gensan ug South Cotabato. Mismong si Regional Director Chief Supt. Benjardi Mantele ang nanguna ug mi-prepara sa maong panagtigum sa tabang usab ni Chief PIO Resty Damaso ug kinatibuk-ang pwersa sa kapulisan. Luyo sa gi-andam nga pahalipay alang sa mga media practitioners kung diin ubay-ubay nga mga appliances ang libreng madawat, nagpakita usab sa ilang talento ang mga kapulisan pinaagi sa pagsayaw ug kanta kung diin maka-angkon ug dakong kantidad sa salapi ang makasakmit sa titulong kampeon. Dako ang pasalamat ni Chief Supt. Mantele sa usa ka adlaw nga panagtigum sa PNP ug mga media tungod tumong sa maong okasyon arun palamboon pa ang panag-uban sa kapulisan ug magsisibya luyo sa kabisihon sa trabaho. (Kathy Kasayan)

46 anyos, sikop sa buy bust
operation sa PDEA!

PDEA RO 12- Sikop ang usa ka Michael Asprer, 46 anyos, minyo, walay trabaho nga taga St. Anthony Street Poblacion Kiamba, Sarangani Province human nagpahigayon ug buy  bust operation ang puwersa sa kapulisan ug ang Philippine Drug Enforcement Agency (PDEA) niadtong Oktubre 26, 2011 sa Hidalgo St. Brgy. Poblacion Kiamba, Sarangani Province.  Nakuha gikan sa suspetsado ang tulo ka sachet nga shabu ug mark money nga P500. Sa kasamtangan, gihan-ay na sa kapulisan ang ipasakang kaso nga paglapas sa Republic Act 9165 ngadto sa suspetsado.
(Gretchen Oliver/ Dave Silagan)