NEWS

Patay sa dakbayan giimbestigahan

GSCPO- Padayun gihapon ang ginahimong imbestigasyon sa mga kapulisan may kalabutan sa sunod-sunod nga pagpamusil  sa dakbayan kung diin onse na ka tawo ang nabiktima ug kasagaran sa mga suspetsadong nakamotorsiklo kun  “riding in tandem” sulod sa duha ka semana ning intrada pa lamang sa bulan sa Enero ning tuig dos mil dose. Sa maong ihap lima niini ang nahikabsan sa kinabuhi human nakahiagum ug mga igo sa bala sa kalibre kuwarentay singko nga armas.
 Kahinumduman nga nag sugod ang pagpamusil sa mga nagkalain-laing biktima niadtong Enero 2 kung asa unang nabiktima si Michelle Dianga 19 anyus , gipusil sa Bar nga iyahang ginatrabahuan isip usa ka waitress didto sa may Fatima Uhaw kung diin atubangan lang gayud kini sa usa ka estasyon sa pulis sa moang lugar. Si Christopher “Cris” Guarin 42 anyus taga Naval Subd. Brgy. Lagao usa ka blocktimer  sa RMN Radio Station ug publisher sa usa ka pamantalaan dinhi sa syudad ug gipusil patay niadtong Enero 5 sa may Conel Road Brgy. Lagao kung diin nakahiagum kini ug pipila ka samad pinusilan sa iyahang kalawasan , samdan usab nianang higayuna ang asawa ni Chris nga si Lyn Guarin. Sunod mao si Oliver Dayap 30 anyus taga Brgy. Calumpang ug usa ka traffic Enforcer sa syudad nga gipusil patay didto sa may J. Catolico Street Brgy. Lagao niadtong 6 sa Enero kung diin naka angkon kini ug samad pinusilan sa dughan ug tiyan. Si Rodrigo Maantos Gicale 50 anyus nga taga Prk. Sto. Niño Brgy. San Jose ug usa ka empleyado sa Stanfilco nga gipusil niadtong gabii sa Enero 8 sa mismong balay niini, sunod mao ang usa ka
Airport Pulis nga si PO1 Oliver Galon Amor 30 anyus nga taga Carcon Vil., Blk 24 Lot 21 Brgy. Lagao ug naga-arkila sa usaka lawak  sa Prk. 3 bBk 11 Lot 9 Brgy. Fatima kung diin siya gipusil patay sa wala mailhing suspetsado niadtong kadlawon sa Enero 9. Sunod mao ang duha ka salesman nga silang
Christian Pascual 32 anyus ug lumopyo sa Brgy. Apopong  ug Mark John Palma 24 anyus nga taga Zone 1 Brgy. Buayan nga gipusil niadtong 10 sa Enero didto sa may Corner Natividad ug Arazada St. Brgy. Lagao ulahi mao Micheal Joven Luna 25 anyus ug lumopyo sa Zone II-B, KPS Brgy. Labangal niadtong Enero 13 kung diin gipusil patay kini sulod mismo sa  iyahang pinuyanan.Samdan usab sa dalonggan nga bahin  si Ivan Aguilar usaka OIC sa J-Kro Bar nga nahimutang sa J.Catolico ning dakbayan, human kini  gipusil sa wala mailhing suspetsado. Niadtong pitsa desi sais gipusil sa makadaghang higayon si Renato Tom nga taga Maasim sa nakamotorsiklo sa may Lanoy Calumpang. Nadala pa sa balay tambalanan ang biktima apan wala na kini nasalbar pa sa mga doktor ug nahikabsan kini sa kinabuhi.
(Dave Silagan)

Balay sa Ex-Councilor giransak

Giransak ang balay sa kanhing konsehal sa syudad nga si Atty. Dominador Lagare Sr. sa Ventilacion Street, Brgy. Lagao ning syudad sa Heneral Santos kadlawon ning milabay'ng adlaw. Sumala pa sa report sa kapulisan nga misulod matud pa ang wala mailhing suspetsado samtang tulog ang mga biktima ug pugsanong gibawog ang puthaw nga kural. Misulod ang mga suspetsado sa lawak sa anak sa konsehal nga si Atty. Marry Ann Lagare Academia ug bana niining si Jerry Academia .Gilimas sa mga suspetsado ang pipila ka mga mahalong butang ug importanteng papeles sa mag-asawa. Nakuha sa mga kawatan ang laptop sa biktima nga nagkantidad ug 45 mil ka pesos, usa ka Nokia cell phone nga mibalor ug 35 mil ka pesos, usa ka blackberry cellphone nga nagkantidad ug 35 mil ka pesos, Sonny Ericsson nga cell phone nga mi kantidad ug 30 mil ka pesos ug 3 mil ka pesos nga cash, credit cards ug pipila ka mga ID ni Atty. Marry Ann Lagare Academia. Gikuha usab sa mga kawatan ang relo nga casio sa bana  niini  nga nag  kantidad ug 23 mil ka pesos, pitaka  nga adunay unod nga 2 mil ka pesos, permit to carry firearms license ATM, ID ug uban pang importanteng papeles.
Sa kasamtangan nagpahigayun pa ug follow-up Investigation ang mga personahe sa police station 3 aron masikop ang mga wala mailhing suspetsado sa pag panguna ni SPO1 Ronald Dinero mga maoy imbistigador sa maong kaso.
(Dave Silagan)

Dagkong Opisyal sa AFP gihatagan
ug Award sa DENR

Nakadawat ug ganti ang mga opisyales sa Armed Forces of the Philippines- Eastern Mindanao Command gikan sa Department of Environment and Natural Resources XI (DENR XI) tungod sa padayong pag suporta ug pag implementar sa Executive Order 23.  Namatikdan nga nakig alayon ang DENR sa Philippine National Police, Local Government Unit, Philippine Army ug uban pang stakeholders aron masiguro nga masunod ang rekisitos sa EO 23 kun asa gideklara ang moratorium sa pagpamutol ug punoan sa kalasangan u gang pagmugna sa anti-illegal logging task force. Gihatag ni DENR XI Regional Director Jim O Sampulna ang plaque of appreciation kang Lt. General Arthur Tabaquero, Commander sa EMC, Major General Victor Felix, 4th Infantry Division Commander, Maj. Gen. Jorge V. Segovia, Commander sa 10th Infantry Division, Colonel Glorioso V. Miranda, 1002nd Infantry Brigade Commander, 1003rd IB Commander Col. Lysander Suerte ug Col. Ronald Albano, commander sa 402nd IB sa Philippine Army. Sigon pa ni Gen. Tabaquero nga nakig alayon ang Philippine Army sa DENR ug uban pang ahensya aron sa pag implementar sa EO 23, “In support to the issuance of EO 23, it is therefore part of our duty to look after those who continue to defy the order and still engage to illegal logging activities.” Dugang pa niini nga sa tuig 2011 nga daghan ng nasikop ang kasundaluhan nga illegal nga tabla sa habagatan sa Mindanao subay usab sa “OPlan Bayanihan” sa kasundaluhan.
(Rhay M. Dela Cruz)

Katawhan nakighiusa
sa Pit Senior

Brgy. Bula-Gibana-banaang mokabat ngadto sa trantay singko mil ka mga katawhan ang mitambong sa pagsaulog sa kapistahan sa Barangay Bula niadtong nakalabay nga petsa 15 ning bulan sa Enero, kini ang gihimong pagkumpirma ni Kapitan Eduardo Cesar Vargas. Subay niini dako ang pasalamat sa nahisgutang kapitan human nga nagmalinawon ang maong kapistahan. Apil nga gipasalamatan sa kapitan mao ang mga katawhan nga nakigduyog kanila ingon na ang mga otoridad nga maoy mihatag ug ayuda aron mamintina ang kalinaw ingon na ang dagan sa trapiko sa maong adlaw. Kini gilangkuban sa 50 ka mga kapulisan nga gipangkatag sa nagkalain-laing dapit sa maong Barangay. Gipasalamatan usab sa kapitan ang kinatibuk-ang puwersa sa Police Station 6 ug sa Joint Task Force Gensan. Kalakip nga gibutang sa nag-unang kadalanan sa maong barangay mao ang duha ka Mini Tank. Sagad sa nabalhog sa presento 6 mao kadtong nangahubog na.
 Ang nahisgutang okasyon ang gisugdan sa pagsaulog sa usa ka misa, gisundan sa usa ka fluvial Parade nga gisalmutan sa 200 ka mga fishing boats, kung asa kini nagsugod sa Queen Tuna Park padulong sa Fish Port sa Brgy. Tambler ug mibalik kini sa Queen Tuna Park. Daghan usab ang misalmot sa sinulog kun diin nahuman kini mga ala una sa hapon. Samtang gibutyag ni Kap. Vargas nga usa sa mga gikahinaman sa mga katawhan mao ang Isda-isdaan.