NEWS

VM Nograles nanghinaot nga walay GDS
sa syudad

Nanghina-ot karon si Gensan City Vice Mayor Shirlyn Bañas Nograles nga wala'y Gensan Death Squad human sa sunod-sunod nga panghitabong pagpamusil patay sa syudad, kini ang nahimong pamahayag sa nahisgutang ikaduhang alkalde niadtong adlaw nga Dominggo atul sa paglubong kang kanhing Bombo Radyo Anchor ug kanhing RGMA Super Radio Manager Cris Guarin.   “Sa nangyayari ngayon ah.. sa nakikita natin may pattern ehh… usually nakamorsiklo, may back ride, naka-jacket ganun yung pattern and off course indication yan, sana wala lang talaga.” sumala pa ni VM Nograles.  Dugang pa niini human nga naaprubahan ang ordinansang giduso ni Kagawad Vicente Dante nga mao ang Gun Control Ordinance of 2010 kun mas ilado sa ginatawag nga “Gensan Gun Free Zone.”  “After na ikinasa itong ah.. Ordinance atsaka yong executive order na sponsored by Councilor Dante, mas lumala yong incidents, sunod-sunod na yong patayan dito sa ating syudad.” dugang pamahayag niini. Sa pikas bahin malaumon si VM Bañas Nograles nga mahatagan ug hustisya ang pagkamatay kang Guarin. “I hope and I'm praying na mabigyan ng Hustisya yung nangyari kay Cris Guarin, lalo na sunod-sunod na yung mga killing incidents na wala pa ring Hustisya.” ang pamahayag sa ikaduhang alkalde sa syudad. 
(Ed Angeles)

Tuka Beach sa Kiamba i- develop
ni Congressman

“Sa mas madaling panahon” Kini ang gibutyag ni Sarangani Congressman Manny Pacquiao nga pagdevelop sa nindot nga Tourist Destination sa Kiamba Sarangani Province nga mao ang Tuka Beach. Sumala pa sa kongresista nga kini ang mamahimong kabahin sa plano niini nga pag-amping sa mga dapit nga mamahimong tourist spot sa iyang probinsya. Nasayran nga mukabat sa 6 ka ektarya nga luna ang gilapdon sa dapit nga andam niining i-develop sama sa pag tukod niini ug mga cottages, mga pasilidad sa mga turista ingon man ang saktong seguridad niini. Gibutyag usab ni Congressman Pacquiao nga ang Tuka 2, 3 ug 4 ang mamahimong prayoridad sa maong pagdevelop diin nag paabot na lamang sa mga igong papeles nga gihan-ay sa kongresista ngadto usab sa mga opisyal sa Department of Environment and Natural Resources (DENR). Kahinumduman nga unang nang nahimong ambassador sa DENR ang kongresista diin kabahin sa iyang mga adbokasiya ang pag pahunong sa mga illegal logging sa Mindanao. Dako usab ang gihimong pagpasalamat ni Mayor Danny Martinez sa pagbisita ni Congressman Pacquiao sa iyang Munisipalidad gumikan kay kadungganan alang sa mga taga Kiamba matud pa nga bisitahon sila sa ilang mahal nga kongresista. Gidugang pa ni Congressman Pacquiao nga abli alang sa tanan nga mobisita sa maong dapit nga iyang i-padevelop diin pwede silang mag fish feeding, snorkeling,diving ingon man ang pag pangaligo sa nindot nga babay sa tuka Beach nga puti kayo ang babayon. Nasayran nga kauglingong bulsa ang paga kuhaan sa pondo sa pag panindot sa Tuka Kiamba Sarangani Province.
(Cris Legaspi/Joemar Plasabas) 

    Gensan, Most Dangerous City in Media
Killings- Kag. Bagonoc

Sangguniang Panlungsod- Aminado si Kag. Elizabeth Bagonoc, Chairman of the Committees on Trade Commerce and Industry, Public Affairs, Consumer's Protection and Information and Committees on Rules ug kasamtangang Majority Floor Leader sa 16th Council nga usa ang dakbayan sa Gensan sa mga delikadong lugar alang sa mga Media Practitioner. Sa gipahigayong 73rd Regular Session niadtong Enero 10, gipagawas ni Kag. Bagonoc ang kasubo nga gibati niini human sa nahitabong sunod-sunod nga pagpamusil sa dakbayan. Una niini ang pagpusil patay sa higala niini sa susamang buhat nga si Cris Guarin, publisher sa usa ka mantalaan sa dakbayan niadtong Enero 7 kung diin nakahiagom ug 5 ka samad pinusilan gamit ang punto kuwarentay singko nga armas. Samtang padayon pa ang gipahigayong imbestigasyon sa kapulisan sa maong panghitabo gisundan gilayon kini sa pagpamusil sa usa ka traffic enforcer nga si Oliver Dayap. Gumikan niini naalarma ang mga magsisibya sa dakbayan ug mihangyo nga tugutan ug makakuha ug “permit to carry fire arms” arun adunay magamit isip pang depensa sa ilang kaugalingon. Nagpatawag usab ug usa ka panagtigom si Mayor Darlene Antonino-Custodio ug pipila ka mga media practitioner sa Gensan ang mitambong. Gipasalig niini nga pangitaan ug pamaagi arun malikayan na ang pagpamatay sa mga magsisibya sa iyang lugar. Makigpulong matud pa kini kang PNP Chief Nicanor Bartolome nga tugutan nga makahupot og armas ang mga miyembro sa media. Kung posibleng mahinayon ug ma-aprubahan ang maong hangyo kinahanglan gamiton matud pa sa mga media practitioner ang armas sa saktong pamaagi. Sa kasamtangan mukabat na sa 158 ka mga media practitioner sa dakbayan ang gipatay sugod niadtong tuig 1986. 
(Kathy Kasayan)

Autism Conscious Week, ipahigayon

Gikatakdang magsaulog karong Enero 22 hangtod 28 tuig kasamtangan ang Autism Society Philippines Inc.- Gensan Chapter sa ilang Ika-16 nga National Autism Conscious Week nga adunay temang “Making the Rights Real for Filipinos with Autism.” Usa sa mga kinadayagan kun highlights sa maong selebrasyon mao ang “Aerobics for a Cause” kung asa ipahigayon kini karong Enero 22, 2012 didto sa Robinsons Place Gensan. Sumala pa ni Ms. Aying Solizar ang presidente  sa ASP- Gensan nga tinuig matud pa kini nga selebrasyon kung asa tumong aron mahatagan ug suporta ilabi na ang mga ginikanan nga adunay anak nga “autistic”. Usa ka “symposium” usab ang ipahigayon anang semanaha kung asa nakasentro kini kung unsa sa paggiya ug pagdala sa mga bata nga “autistic” aron dili matud pa motumaw ang pagsapot sa bata. Sa kasamtangan aduna na'y 55 ka myembro ang maong organisasyon samtang gilaumang mo-usbaw pa kini.
(Ed Angeles)

PNP gihagit sa NUJP
Gensan 

Gensan Sports Center- Gihagit sa pangulo sa National Union of Journalist of the Philippines (NUJP) Gensan Chapter nga si Edwin Espejo ug pipila ka mga media practitioner sa syudad ang mga opisyales sa Philippine National Police nga kung dili matud pa masulbad ang pagpatay kang kanhing RGMA Super Radyo Station Manager Cris Guarin mapugos matud pa silang manawagan nga ilisan ang kasamtangang opisyal sa PNP sa syudad ug sa tibook rehiyon. “Kung hindi nila mabibigyan ito ng lunas ang kamatayan ni Cris Guarin, baka mapilitan tayo na manawagan na e-relieve ang lahat ng mga Police Officials.”  kini ang nahimong pamahayag NUJP President Gensan Chapter Edwin Espejo niadtong nakalabay nga adlaw didto sa Gensan Sports Center kung asa gipahigayon ang press conference mahitungod sa pagpusil patay kang Cris Guarin niadtong Enero 2, 2012. 
Wala usab gitubayan ni PNP City Director PSSupt. Cedrick Train ang maong hagit.  Sumala pa niini kinahanglan dili laayon sa paghulat tungod galihok matud pa sila alang sa kasulbaran sa maong kaso ug dili matud pa nila kinahanglan nga ihatag ang tanang impormasyon kun ang solidong ebidensya sa magsisibya. Sa pikas bahin, naningkamot usab ang sektor sa mga magsisibya ning syudad sa pagpanguna sa NUJP Gensan ug KBP SarGen Chapter nga gipangunahan ni James Catalan, aron masulbad gilayon ang maong kaso. Sa inisyatibo sa mga magsisibya, target niining makalikom ug Dosyentos Mil kun 200,000 pesos isip reward kung si kinsa man ang makatudlo sa suspetsado (gunman) ug kung si kinsa gayud ang utok sa pagpusil patay kang Cris.
 (Ed Angeles)

Unsaon pagbaton ug Healthy New Year…

Ang sumpay…Samtang sa bulan sa Hunyo ampingan usab ang panit tungod kay kini panahon sa summer ug dili na mabantayan nga daghan ang panahon nga inyong gitiner sa gawas nga bahin ug sobra kining na- expose sa init sa adlaw nga maoy usa sa makadaot sa panit. Mogamit ug mga sunscreen nga dunay taas nga spectrum SPF values nga 15, mogamit ug mga sapot nga matabunan ang panit nga direktang ma-expose sa adlaw. Kanunayon ang pagbutang ug sunscreen, ilabi na sa nawong, dalonggan,liog ug ang kamot. Sa bulan sa Hulyo himu-a ang gitawag nga exercise outdoors,mas makaayo ang pagsimhot ug priskong hangin.maka-ayo usab ang rock climbing, pagbisiklita, paglakaw lakaw sa baybayon ug uban pang mga buluhaton nga makapahimsog sa inyong kasingkasing. Ipacheck-up usab ang kahimsog sa paglawas sa inyong mga bata inig abot sa bulan sa Agusto.ilabi na niadtong mga nagtungha, kinahanglang tan-awon kun kompleto kini sa gina-require nga mga vaccines sa mga doctor. Pagpalimpyo usab sa mga ngipon ang angay nga tagaan ug pagtagad inig abot sa bulan sa Setyembre. Mas makaayong himuong regular ang pagbisita sa inyong dentesta, kini aron mabantayan ang mga posibling balatian nga ang mga sintomas mamatikdan sa baba sa tawo, sama na lamang sa gum disease, hearth disease, stroke ug diabetes. Samtang sa bulan sa Oktubre kinahanglan usab nga himuong himsog dili lamang ang physical nga pasture kung dili lakip na dinhi ang emotional well-being sa tawo. Kini pinaagi sa meditiation kini ang matud pa makakontrola sa stress. Ang pamaaging pag yoga ang usa sa sagad ginarikomenda sa mga hanas aron hingpit nga mapa relax ang kaugalingon. Inig abot sa bulan sa Nobyembre pakigkita-i ang mga doctor alang sa mammogram ug prostate exam. Matud pa nga ang mga babayeng walay kaliwat nga dunay breast cancer ang girikomendang mupailalom sa mammograms matag tuig ilabi na niadtong ana-a sa pangidaron nga kuwarenta ka tuig pataas. Samtang sa bulan sa Disyembre kinahanglang likayan ang tentasyon sa gitawag nga holiday season nga mao ang daghang mga kaon nga makapadugang sa inyong cholesterol.  Matud pa ni Dr. Cary Nelson nga usa sa pakigbatok sa holiday stress mao ang pag ehersisyo ingon na kinahanglan gihapon ang tama ug tukmang pagkaon (Venus C)