ENTERTAINMENT

Pacman subling nahimong Cover Magazine

Cover na usab sa usa ka sikat nga magazine si Boxing Champ Sarangani Congressman Manny Pacquiao nga mao ang Esquire Philippines sulod karong bulan nga adunay “5 Rounds with Manny Pacquiao issue”.  Dako ang pasalamat sa staff sa maong magazine tungod miuyon ang kongresista nga mamahimong cover. Kahinumduman nga pipila ka mga writer ang misikat tungod sa pag publish ug mga artikulo may kalabutan sa kinabuhi ni Pacman susama ni Gary Andrew Poole nga mipagawas sa “Behind the Scenes with Manny PacquiaoThe Greatest Pound-for-Pound Fighter in the World," nga mitabang kaniya arun mas mamahimong sikat ilabi na ang Esquire Magazine. Naangkon usab sa United Kingdom ang Best Sports Book 2010 human gipagawas ang Poole's Pacman Bio issue.
 (Kathy Kasayan)

   Jinkee Pacquiao,
misaludo kay Anne!

Misaludo kang Anne Curtis ang kapikas ni Sarangani Cong. Manny Pacquiao nga si Jinkee Pacquiao human kini mitan-aw sa pelikula nga gibidahan sa aktres nga mao ang “No other Woman”. Sumala pa ni Mrs. Pacquiao, naka-relate matud pa kini sa dagan  sa istorya sa maong pelikula hinungdan nga misaludo kini sa pag arte ni Anne. Kahibaluan nga gipilahan sa fans sa mga cast ang naasoy'ng movie ug bisan ang mga edaran wala nagpalupig ug mitan-aw usab sa maong pelikula. Luyo kay Jinkee, ubay-ubay usab nga susama niining mga artista ang misaludo sa iyang acting susama na lamang ni Kris Aquino, Ruffa Guttierez, Toni Gonzaga ug Boy Abunda. Samtang wala usab nagpalupig si Cristine Reyes human napabilib niini si Gretchen Barreto.
(Kathy Kasayan)

Venus Raj, napili sa DSWD isip
“Ambassador for Poor Kids”

Dako ang pasalamat ni 2010 Miss Universe fourth-runner up Maria Venus Raj human gipili sa Department of Social Welfare and Development (DSWD) nga mamahimong  Ambassador for Poor Children. Say pa ni Raj, usa matud pa ka dakong dungog  ang mamahimong Ambassador ilabi na sa mga bata nga kabus. Misaad usab ang Beauty Queen nga  himoon matud pa niya ang iyang responsibilidad alang usab sa kamaayuhan niini. Lakip sa mga trabaho sa 23 anyos nga Bicolana nga Host mao ang pagtabang sa mga kabatan-unang Pilipino nga pakigbisugan ang katungod nga makatungha ug mahatagan ug maayong  pag-atiman sa kalawasan.  Una nang gipamahayag sa DSWD nga dako ang ilang pagtoo ug pagsalig nga mamahimong epektibong ambassador si Venus tungod naggikan kini sa naglisod usab kun kabus nga pamilya samtang naningkamot aron makab-ot ang kalampusan.  Gipasalamatan usab sa nahisgutang Beauty Queen ang bag-ong nadawat niining dungog sa 10th Annual Gawad Amerika Awards Night isip "Woman of the Year."  Ang Gawad Amerika Award usa ka tinuig nga ginahatag sa Gawad Amerika Foundation aron pasidunggan ang tawong nagmalampuson sa ilang kinabuhi ug nakahatag ug kabag-ohan sa ilang komunidad pinaagi sa pagtabang niini sa isig katawo.
(Ashanna Lucman)