ENTERTAINMENT

Jinkee  gikalipay ang
pagkahimamat kang Beckham

Hilabihan ang kalipay'ng gibati sa asawa ni Eight-Division World Champion Manny Pacquiao nga si Jinkee, kini human sa espesyal nga paghatag ug pagtagad ngadto kanilang duruha sa giilang Football Legend David Beckham atul sa gipahigayong Football Match tali sa  Los Angeles Galaxy ug Philippine Azkals niadtong nakalabay nga simana, kung diin apil nga misaksi ang mag-asawang Pacquiao. Nasayran nga samtang nagpahulay si Beckham gihubo matud pa niini ang gisuot nga jersey ug gihatag kang Pacman. Una nang nasayran nga si Misis Pacquiao ang super fan ni Beckham. Daw naa sa cloud nine si Jinkee sa dihang miduol kanila si Beckham ug gitunol  ang jersey niini ug gipapahid pa sa nagkasingot nga nawong niini. Gibutyag pa ni Mrs. Pacquiao nga iyang ipa-frame ang nahisgutang jersey. Una nang gibutyag ni Beckham nga iyang idolo si Pacquiao, ug matud pa mas giganahan kini sa pagdula tungod kay iyang nasayran nga ana-a sa bench naglantaw ang iyang idol nga si Pacquiao.
(Venus C)

Mo Twister kasuhan
ni Rhian Ramos

Desidido na si Rhian Ramos nga kasuhan ang kanhi niining hinigugmang si Mo Twister. Gani niadtong nakalabay nga adlaw unang misang-at ug petisyon ang actress sa korte aron mahatagan ug proteksyon batuk kang Mo. Gibutyag usab sa abogado sa actress Attorney Lorna Kapunan nga ang nahisgutang petisyon ang paagi aron dili na makaduol si Mo kang Rhian. Kahinumduman nga nakurat na lamang ang kadaghanan sa dihang nagkatag na sa internet ang video statement ni Mo kabahin matud pa sa pagpakuha (ABORTION) ni Rhian sa gisabak niini didto sa Singapore. Gidugang pa  sa maong video nga tulo ka bulan ug tunga na ang gisabak ni Rhian nga siya matud pa ang amahan niini. Gihimo matud pa ang planong pagpa-abort sa nagdumala sa career ni Rhian. Gipakita usab ni Mo sa maong video ang mga dukomentong nagpamatuod nga buntis ang iyang hinigugmang si Rhian sama na lamang sa pregnancy test.
Sa pikas bahin gipanghingusgan ni Attorney Kapunan nga ang lakang ni Mo ang usaka kasupakan sa Anti- Violence Against Women and Children's Act. Una niini nagbahad usab ang  TV Network nga kasuhan si Mo Twister tungod sa malisyosong mga pahayag niini sa video. (Venus C.)

Miss Earth- Water  2011 nasakmit sa Pilipinas

Nakahilak sa kalipay ang kandidata sa Pilipinas nga si Athena Mae Imperial sa dihang nasakmit niini ang 2nd  Runner up sa gipahigayong Miss Earth 2011 didto sa University of the Philippines Diliman Theater niadtong nakalabay nga gabi-i. Sa kinatibuk-ang otsentay kuwatro ka  mga maanyag nga kandidata nakuha ni Miss Imperial  nga tubong Casiguran, Aurora ang Miss Earth- Water. Samtang nasakmit usab ni Miss Olga Alva nga taga Ecuador ang Miss Earth  2011, Miss Earth- Fire ang taga Venezuela nga si Caroline Medina, ang taga Brazil usab ang nakakuha sa titulong Miss Earth- Air nga si Driely Bennettone . Daghan ang midayig sa  kaanyag sa  mga kandidata sa dihang gipasundayag na nila ang ilang kaugalingon suot ang ilang evening gown, kalakip sa nakakuha ug pagdayig mao ang taga Ecuador nga misuot ug white sequined gown nga dunay sexy cut, Miss Mexico nakasuot ug white-flowing gown kung diin see through ang pipila ka bahin sa maong gown, ang Miss Philippines ang naka pula ug gown nga ang disinyo gigamitan ug mga sequins, ang Miss Zimbabwe ang migamit ug pinasahi nga gown nga adunay Animal Print. Sa naandan ang tubag sa mga kandidata ang gikuhaan ug dakong puntos sa mga hurado.
(Irene C./Venus C.)