NEWS

Youth for Peace Congress gipahigayon!

Camp Panacan-  Gipangunahan sa 10th Infantry (Agila) Division pinaagi ni Major General Jorge Segovia, Commanding General sa 10th ID, Philippine Army ang tulo ka adlaw nga Youth Congress aron mahasa ang kabatan-unan isip lideres sa nasud nga mamahimong magpadayon sa adbokasiya sa Peace and Development. Mitambong ang tresientos sietentay nuebe ka kabatan-unan gikan sa nagkadaiyang probisnya sa Rehiyon onse ug SOCSARGEN area sa nahisgutang Youth Peace Congress. Gisugdan ang programa pinaagi sa duha ka adlaw nga camping sa Division Training Unit sa 10th ID sa Mawab, Compostela Valley kun asa gipili usab ang labing unang opisyales nga mamahimong representante sa mga kabatan-unan. Gitutukan sa nahisgutang panagtigum ang kapasidad nga manguna ug mosulti sa ilahang mga nagkadaiyang ideya sa mga nagahitabo sa nasud. Nahimo usab nga tigpamulong si Ms. Maria Ressa, multi awarded journalist, Ms. Patricia Evangelista, kolumnista ug tv personality, Ms. Chay Hofileña, associate editor sa New Break Magazine ug Ms. Glenda Gloria usa usab ka award winning journalist. Ang yout for peace congress usa ka pamaagi sa 10th ID aron mamahimong tulay tali sa kabatanan-unan ug kasundaluhan isip mga Advocates sa Peace and Development.
(Rhay M. Dela Cruz)

Lakbayan 2 batuk  Large Scale
Mining gipahigayun

General Santos City- Mupahigayon ug lima ka adlaw nga Lakbayan II ang grupong Bagong Alyansang Makabayan ug BAYAN SOCSKSARGEN sugod Disyembre 6 hangtod Disyembre 10, 2011 nga ang rota niini  adunay gilay-on nga 150 sa pagalaktan agi ug pakigbisog batok sa Large-Scale Mining sa Xstrata SMI ug ang padayong militarisasyon ug paglapas sa katawhang katungod. Gibutyag  ni Ryan Lariba, BAYAN Secretary General nga dunay tema nga “Lakbayan II: The fight continues: People's march against large scale mining and human rights violations ang nahisgutang aktibidad nga pagasugdan sa Digos City Freedom Park, Davao del Sur ug mahuman kini sa Koronadal City, South Cotabato subay  usab sa International Human Rights Day commemoration kalakip usab ang KARAPATAN sa pagpanguna ni Sadrach Sabella, Spokesperson ug KALGAD sa pagpanguna ni Tudio Masukal ug mokabat sa 3 mil ang moapil sa maong protesta. “As the march pass by in different localities, we'll likewise urge its local government units to take strong stance against Xstrata-SMI, massive militarization, dislocation of lumads from their communities and environmental destruction. If they really for the people then they should oppose large-scale mining and human rights violations”, pamahayag ni Lariba.
Hinoon gikadugang pa niini nga padayon ang pagpakigbisog sa militanteng grupo aron dunggon ang mga problema kalabot sa pagpanglapas sa tawhanong katungod ingon man ang padayong pagguba sa kinaiyahan.
( Danny Bojos, Jr./Arnel Arsolon )

 NCIP sagrado sa pagpili ug
representante 

Brgy. Apopong -Gihingusgan ni NCIP 12 Chief Administrator Magpantau Manamba nga mamahimong sagrado ug anaa sa saktong proseso ang pagpili sa mga kadagkuan sa mga lumad.
Niadtong milabay'ng biyernes sa usa ka panagtigum sa Jericho's Place, nahimung mainiton ang diskusyon atubangan nilang Magpantau, Atty. Rochelle Mahinay- Sero, Datu Al Hassan sa Cultural Affairs sa LGU  ug ang mga aspirante nga nagagikan pa sa nagkadaiyang Barangay sa GenSan.
Migula nga adunay problema ang proseso ug kini ang gipadayag ni Pstr. Ricardo Gawan sa Brgy. Fatima nga adunay lahing grupo ang mihimo ug manifesto nga mikuha ug mga tawo aron pillion bisan paman supak sa polisiya sa NCIP. “ Kapilla na ka beses nga naay mga NCIP kada IEC nila didto, nay giagi nga proposal nga kanang tawo nga gikan sa gawas nga gihakot nila ug gitudlo nila nga dili mao. Mao toy ingon nako sa ila nga unsaon nako pagkuyog sa inyo nga magpaprocess nga pagpiniliay, magbotohay nga dili man mo taga dire?” Saysay ni Gawan.
Gidugang pa ni Manamba nga iagi gayod sa sakto ang pagtuboy ug anaa sa kumunidad sa matag Barangay atubangan sa mga Chieftain ug base sa Kultura sa kinaraan sa tribu.”Dili jud pwede nga dili magsubay sa proseso, kinahanglan sagrado ug subay sa katiguwangan ang pagpili ug kini mahitabo atubangan sa NCIP, DILG, ug LGU”.  Pamahayag ni Manamba.
Kahinumduman nga ang mamahinong mapili, maoy murepresenta sa barangay isip Honorableng  Kagawad ug adunay usa kanila nga ituboy isip murepresenta nga Kagawad usab sa Sangguniang Panglunsod usa  ang tribong Blaan ug Maguindanaon.
( Joemar Plasabas)

Kapitolyo sa Sarangani pormal
nang gipanganlan.
 

 Pormal nang gi-ablihan ang marker sa kapitolyo sa Sarangani niadtong Nobyembre  25, 2011, kini atul sa MunaTo Festival sa maong probinsiya.
Human sa usa ka balaudnon nga naaprubahan sa Sangguniang Panlalawigan nga panganlan na ang kapitolyo ug James L. Chiongbian Building.
Mismo ang Bise Presidente sa nasud Pilipinas nga si Hon. Jejomar Binay ang nanguna sa pag-abli sa tabon sa maong pangalan nga nahimutang sa lobby sa maong kapitolyo.
Gipahayag ni Congressman Manny Pacquiao nga nalipay siya ug dako nga napanganlan na gayud kang James Chiongbian ang maong gambalay gumikan kay siya man  ang founder sa nasampit nga probinsiya.
Kauban ni Vice President Binay sa pag-abli sa bag-ong pangalan mao silang Cong. Manny Pacquiao, Gov. Migs Dominguez, Vice Gov. Steve Solon, ug mga Board Members sa probinsiya sa Sarangani.
(Arnel Arsolon)
 

Unsaon paglikay sa pagpanugnaw

Kagilok sa tutonlan,lipong ang ulo ug pagpanakit sa kalawasan, kini ang timailhan nga ikaw makasinati ug pagpanugnaw nga musangpot ngadto sa kalintura nga mulongtad usab ngadto sa siyam ka adlaw. Gibutyag ni  Jane Sadler, MD, a family practice physician didto sa  Baylor-Garland Hospital Garland, Texas nga dunay mga paagi aron nga malikayang mamahimong mugrabe ang maong balatian. Kinahanglang batasanong muinom ug tubig , fruit juice tsa-a ug mga sud-an nga sinabawan ilabi na ang sinabawang manok kini ang makatabang aron dili na mugrabe pa ang pagpanakit sa totonlan ug pagpaming-ot sa ilong. Sagulan ug usa ka kutsara nga asin ang usaka basong tubig nga medyo init pa. Kahibaluan nga ang asin maoy makapagawas  sa gitawag nga excess water gikan sa  tissues sa tutonlan, nga maoy hinungdan nga mukonhod ang pagpanghalang  ug mawagtang ang  mga karat  sa tutonlan. Makapawagtang usab kini sa mga bacteria ug mga viruses.makaayo usab ang pag gamit ug saline nasal spray ug  dayon maligo pinaagi sa tubig nga dunay tama tama lang ang kainit. Ang warm water matud pa ang makawagtang sa nagbara sa ilong. Muinom ug mga tambal nga makapawala sa pagpanakit sa kalawasan,pag inom ug honey  ug mulikay una sa pagtrabaho aron kalikayan ang pagkakapoy. Gibutyag nga mas dali nga mabatukan sa kalawasan ang mga viruses  kung makapahulay pag-ayo apan dili usab kini nagpasabot nga gilayon kanang mu-absent sa trabaho. Aron usab nga dili mataptan sa imong sakit ang imong kauban sa trabaho kinahanglan lang nga kanunayon nimo ang pagpanghunaw o kaha pag gamit ug alcohol matag karon ug unya. Kinahanglan usab nga mag ehersisyo kini aron madugangan ang inyong immune system apil na dinhi ang pagkaon ug mga pagkaong adunahan sa protina sama sa karne, isda, beans  ug gulay. Ang mga nahisgutan ang imong pagahimuon sa usaka adlaw lamang ug kung dili gihapon kamo maulian ilabi na kung inyong mabtyagan nga mas naluya kamo, ug hinay hinay na ngta migawas ang inyong kalintura, kasuka-on ug ang pamati nga grabing kasakit sa ulo kinahanglan na gayud nga kamo mubisita sa inyong mga doctor tungod kay kini ang dili na mga sintomas sa simple lang nga pagpanugnaw kung dili sintomas na kini sa ubang pang mga balatian. ( Venus C.)