NEWS

Gymnasium sa Pag-asa Alabel,
sugdan na!

Alabel Sar. Prov.- Sugdan na ang pagpatukod ug Covered Court sa Pag-asa Alabel, probinsya sa Sarangani human gipahigayon ang Ground Breaking Ceremony niadtong Nobyembre 30, tuig kasamtangan sa nahisgutang lugar. Gipangunahan ni Sarangani Congressman Manny “Pacman” Pacquiao ang maong seremonya lakip na ang presensya ni Sarangani Board Member Eugene Alzate, BM Elmer de Peralta, pipila ka mga personahi sa Sarangani Congressional Office ug Alabel Mayor Corazon Sunga Grafilo.
Sumala pa ni Cong. Pacquiao, ang pagpatukod sa maong gambalay arun ipakita niini ang iyang pasalamat sa mga Sarangan nga nagtuo sa iyang kapasidad nga mudumala isip kongresista sa probinysa. Gi-dugang pa niini ang pagtuman sa iyang gisaad sa katawhan ayha nagpapili niadtong 2010 election. Gumikan niini mapasalamaton usab ang mga residente sa Pag-asa Alabel human mahinayon na ang pagtukod sa ilang covered court.  Dako usab ang pasalamat ni Hon. Lente L. Salway Jr. kapitan sa nahisgutang barangay sa suporta nga gipakita kanila ni Congressman Pacquiao. Matud pa niini, usa ka maayong lider si Pacquiao nga kinahanglan sundon sa mga konsehal tungod bisan busy ang schedule niini luyo sa natad sa boksing, dili gihapon niini makalimtan ang trabaho isip kongresista sa Sarangani Province pinaagi sa pagtabang sa mga kabus.
 (Kathy Kasayan)

Congressman paimbestigahan ang
Fish Kill sa Maasim

SARANGANI PROV.-Mismo nga si Hon. Cong. Manny Pacquiao ang nangunay nga giadtuan ang Munisipalidad sa Maasim Sarangani Province aron nga masuta ang tinud-anay nga hinungdan sa natigayun nga “Fish Kill” sa maong dapit. Kauban si Mayor Jose Zamorro, BM Lemuel De Peralta ug ang mga Brgy. Kapitan sa Maasim nagtigum, sa Munisipyo arun nga masayran sa nasangpit nga kongresista  ang rason sa mga kapitanes sa Brgy. Tinoto, Daliao, Pananag, Lumatil, Kanalo, Bales, Kamanga, Pobalcion ug mga kasikbit nga dapit. Matud pa ni Cong. Pacquiao “gusto nako nga masayran ngano unsa ang hinungdan sa fishkill dinhi sa Maasim,kamo mga kapitan dapat nga masulbad ang problema, kay kamo usab ang mayor sa inyung Brgy. ug kung dili masulbad isumbong sa inyong Municipal Mayor.”  Gikabutyag sa usa sa mga kapitan nga mitambong  nga duna silay namatikdan nga sumala pa mga bangkang panagatan ang midayo sa ilang dapit nga dunay pinulungan nga “Samalnon” nga mauy ilang namatikdan nga nanagat adtung higayuna. Samtang nga gikabutyag usab ni  Maasim Mayor Jose A. Zamorro nga  dako ang posibilidad nga tungod sa Likom nga pamaagi sa  pagdakop ug isda  ang hinungdan sa “fish kill” sa maong lungsod human sa pagkamatay sa mukabat sa 20 ka tonelada nga mga isda nga naglutaw-lutaw sa kabaybayonan sa upat ka barangay , Lumasal, Pananag, Kanalo, ug Lumakil sa milabay'ng semana.“Sa among pag-imbestigar uban ang Maasim PNP ug BFAR nasayran adunay daghang similya sa mga isda nga mitumaw nga maoy gigukod sa mga Sambagon ug namonitor kini sa wala pa mailang suspetsadong sa illegal nga panagatang Likom ug tungod sa kadaghan sa nakuha dili na makaya nga makarga sa ilang hinungdan nabuslot ang  fish net ug nangaanod sa balod” pamahayag ni Mayor Zamorro. Dugang niini nga sumala pa ang panagatan nga adunay marka nga 555 maoy gikargahan sa gihisgotan nga panagatan nga sa pagkakaron padayon pang gisuta kung kinsa usab ang nanag-iya niini.
(Anter/Danny B.)

Multipurpose Gym Tukuron na!

Malapatan Sar. Prov. - Gisugdan na ang pagpatindog ug Multipurpose Covered Court sa Lun Padidu, Alabel Sarangani Province human gipahigayon ang Ground Breaking Ceremony niadtong Nobyembre 30, tuig Dos Mil Onse sa nahisgutang dapit. Gipangunahan ni Sarangani Congressman Manny “Pacman” Pacquiao ang maong seremonya lakip na ang presensya ni Sarangani Board Member Eugene Alzate, BM Elmer de Peralta, pipila ka mga personahe sa Sarangani Congressional Office, ug mga Barangay Officials. Sumala pa ni Cong. Pacquiao, ang pagpatukod sa maong gambalay adunay tumong arun ipakita niini sa mga Sarangan ang iyang pasalamat nga nagtuo sa iyang kapasidad nga mudumala isip kongresista sa Probinysa. Tungod niini dako ang pasalamat sa  mga katawhan sa nahisgutang baranggay human nahinayon na ang pagtukod sa ilang Multipurpose Covered Court.  Dako usab ang pasalamat ni Barangay Captain Alexander Figuracion sa proyektong ihatag kanila ni  Congressman Pacquiao. Gihangyo na usab sa nahisgutang kapitan si Cong. Pacquiao ang kabahin sa merkado publiko kung asa malaumon ang mga residente niini nga hatagan sila ug lain na usab nga proyekto.  
(Ed Angeles)

Victory Chapel Fellowship
Members, Nagsubo

Masulob-anon karon ang mga myembro sa Victory Chapel Fellowship ilabi na  kabanay sa pamilyang namatyan tungod sa aksidente sa kadalanan didto sa Banate, Malungon Sarangani Province niadtong nakalabay nga semana. Kahibaluan 13 ka mga biktima  ang nakabsan sa kinabuhi nga pulos myembro sa Victory Chapel Fellowship Center kung asa motambong matud pa kini ug Christmas Party didto sa Samal Island. Lima sa mga nakabsan sa kinabuhi mao silang Pastor Renante Ilugsong nga nadistino sa Kiamba, Pastor Arnold Gabrido sa Maitum, Pastor Rodolfo Asejo sa Alabel, Pastor Ricky Magallanes sa Glan ug Pastor Gilbert Constantino sa San Miguel Calumpang nga maoy nagmaneho sa gisakyang Van.  Patay usab silang Annie Ilugsong, Liza Gabrido, Fe Asejo, Gigi Magallanes, Genibeth Martinez, Harvey Martinez, Liza Constantino ug Babab Constantino.  Samtang luwas usab sa makuyaw nga kahimtang silang Pastor Vic Martinez, Leah Magallanes, Ariel Ilugsong, Micah Constantino ug JM Martinez nga naka-angkon lamang ug bun-og ug samad sa kalawasan nga nagpa-alin sa balay tambalanan. Sa pikas bahin posibling pasakaan ug kasong reckless imprudence resulting in multiple homicide ug multiple physical injuries si Leolalio Rivera nga drayber sa trak nga nabanggaan sa L300 van nga nakakustudiya sa Malungon Police Station. Una paman nahitabo ang maong insidente, nanagtigum matud pa ang mga biktima ug gihisgutan niini kung unsaon sa pagdawat ang kamatayon. 
(Ed Angeles))