NEWS

Operasyon sa Superferry 20, suspendido!

MARINA- Gisuspendi karon sa Marine Industry Authority (Marina) ang operasyon sa Super Ferry 20 nga natanggong sa Zamboanga City human nabanggaan niini ang usa ka lantsang San Jose Bayanihan sa kadagatang sakop sa Barangay Tinoto, Maasim, Sarangani Province ala una ang takna sa kabuntagon ning milabay'ng adlaw.
Gikabutyag sa Marina nga lain pang walo ka mga barko sa Superferry ang temporaryong gipaundang sa pagbiyahe samtang gihimo ang imbestigasyon. Apil sa temporaryong gipugngan sa pagbiyahe sa Marina ang Superferry 21, Superferry 20, Superferry 1, Superferry 2, Superferry 5, Superferry 12 ug Superferry 21.
Kahibaluan nga naluwas sa Coast Guard ug PNP Maritime ang mga mananagat ug gidala sa General Santos City District Hospital apan usa ang missing. Ang mga samdang mananagat nailhang sila Joseph Gediones na taga Habitat, Bryan Enero, 17-anyos taga Malok, Labangal, Marjun Kirames, 20-anyos taga Labangal, Junito Mendoza, 52-anyos, Regalado Caceller, 19-anyos, Rex Polawing, 28- anyos taga Labangal samtang patay na usab ang unang gikatahung missing nga si  Jovani Buntong, 60-anyos nga kanhing Purok Chairman sa Malok, Labangal, General Santos City.
(Gretchen Oliver/ Dave Silagan)

Laborer sa Fishport, gipusil-patay!

MAKAR PNP- Gideklarang dead on arrival sa St. Elizabeth Hospital ang usa ka laborer sa Fishport nga si Renato Rene Baldesco, 33 anyos, minyo nga taga Bulaong Extension, Brgy. Labangal, General Santos City ning milabay'ng adlaw, alas kwatro ang takna sa kabuntagon. Sa inisyal nga imbistigasyon sa kapulisan, naglakaw matud pa ang suspetsado sa Purok Matinabangon, Brgy. Labangal apan usa ka lalaki ang nipusil sa biktima sa makatulo ka higayon. Igo sa ibabaw nga bahin sa iyang tuong bukton ang biktima ug nilapos sa ilalom sa iyang tuong ilok. Blangko usab ang pamilya ug kapulisan sa motibo sa maong pagpamusil.
(Gretchen Oliver/ Dave Silagan)  

Driver Gipusil Patay!

Pendatun PNP- Dead on the spot ang usa ka driver  nga nailhang si Mukthar Malagat hamtong ang pangidaron lomolopyu  sa Tan Compound, Purok Maguindanao, Brgy. Labangal syudad sa Heneral Santos human kini gi pusil sa wala mailhing suspetsado niadtong nobyembre 21 kasamtangang  tuig alas 12:05 ka kadlawon didto sa may Salazar St. Brgy. Dadiangas South General Santos City.
Gibutyag  ni P02 Ronald Baustista imbestigador sa maong kaso nga pipila ka samad pinusilan sa iyahang ulo ug kalawasan ang na angkun sa biktima hinungdan sa hinanaling kamatayon niini, apan wala nila masiguro ang ihap sa samad pinusilan nga na angkon sa biktima tungod daling  gikuha sa kabanay sa biktima ang patay'ng lawas niini. 
Narekober sa crime scene ang kinse ka bala sa kalibre 45 nga pusil. Sa kasamtanagn padayun pang ginasuta sa kapulisan ang motibo sa maong krimen.
(Dave Silagan/Gretchen Oliver)

Ulitawong nangawat, nasikop!

MALAKAS PNP- Nagtingkagol karon ang suspetsado sa pagpangawat nga si Roberto Palmes, 20 anyos, ulitawo ug lumad sa Brgy. Kabalanti-an, Arakan Municipality, North Cotabato ug kasamtangang nagpuyo sa G. Mesa Village Brgy. Lagao, ning dakbayan sa Heneral Santos human kini nangawat sa usa ka tindahan.  Sumala pa sa biktima nga si Irish Banguiran, 25 anyos, dalaga ug residente sa Blk. 1 Lot 6, Agan Grandville, Brgy. City Heights, Gensan nga nagpakauron ingnong mopalit ug sigarilyo ug candy ang suspetsado sa iyang tindahan apan kalit lang matud pang gibira ang iyang kamot ug gihulga kini dungan sa pagbira sa iyang bag nga adunay sulod nga laptop. Daling nakapangayo ug tabang ang biktima sa iyang mga silingan hinungdan nga nasikop ang biktima ug gidala sa San Isidro Police.
(Gretchen Oliver/ Dave Silagan)

Col. Kakilala, gipasidunggan sa SP

Sangguniang Panlungsod- Gipasidunggan sa Sangguniang Panlungsod  si Colonel Joselito E. Kakilala Commanding Officer sa Joint Task Force Gensan ug kasamtangang Commander sa 10th Infantry Division kaniadtong Nobyembre 22, 2011 atul sa 68th Regular Session sa syudad sa Heneral Santos tungod sa naangkon niining ganti isip usa  sa unom nga gihatagan ug Lingkod Bayan Award sa Civil Service Commission (CSC) isip 2011 Oustanding Public Officials and Employees.  Kahibaluan, mismong si   Pangulong Benigno Aquino III ang mihatag ug pasidungog kang Col. Kakilala, didto sa Rizal Ceremonial Hall, Malacañang Palace niadtong mga nakalabay nga adlaw. “I am very proud of myself and especially my family, they are very proudof what I have recieved” pamahayag ni Col. Kakilala.  Nakuha ni Kakilala ang Gold Medal 2011 Presidential Lingkod Bayan Award kauban ang P100,000 nga salapi.  Usa sa mga gibasihan kang Col. Kakilala nganong naangkon niini ang maong ganti tungod  sa mga malampuson niining clearing operation batuk sa mga terorista ug nagpabiling hapsay  ang tibuok Munisipyo sa  Caraga ug Central Luzon. Dako ang pasalamat sa nahisgutang  opisyal sa tanang misuporta kaniya ug awhag na lamang niini sa mga kaubanang opisyal nga maghimo ug mga maayong butang dili lamang sa kaugalingon kun dili apil na usab ang ikamaayo sa tanan.
(Ed Angeles/ Kathy Kasayan)

28 anyos, gipusil nga naglakaw

MAKAR PNP- Gipusil-patay ang usa ka laborer sa Makar Wharf nga nailhang si Rodolfo Subebe alays “Onyok”, 28 anyos, ulitawo nga taga Purok  San Roque, Brgy. Labangal ning dakbayan sa Heneral Santos ning milabay'ng adlaw. Sa inisyal nga imbestigasyon sa kapulisan, naglakaw matud pa ang biktima alas 4 ang takna sa kabuntagon sa Pedro Acharon Blvd. Fatima, Silway apan kalit lang matud pa nga nihunong ang usa ka motorsiklo ug gipusil ang biktima makaduha ka higayon gamit ang kalibre 45 nga pusil. Nakahiagom ug samad pinusilan ang biktima sa ulo ug tuo nga bahin sa iyang dughan. Daling niikyas ang duha ka suspetsado human ang pagpamusil. Narekober sa crime scene ang duha ka bala, usa ka pack sa gituohang marijuana, usa ka plastic sachet nga shabu, lighter, sigarilyo, cellphone ug P180 cash money. Ang maong mga butang gidala na sa Crime Lab aron sa Forensic Ballistic Examination ug Quantative and Qualitative analysis. 
(Gretchen Oliver/ Dave Silagan)