NEWS

Pacman gipasidunggan sa SP

Gi-aprubahan sa Sangguniang Panlalawigan niaging Martes, Nov. 22, 2011, atul sa ilang regular session ang gipasa nga urgent resolution ni Hon. Board Member Cornelio Martinez kabahin sa paghatag ug pasidungog kang Hon. Congressman Manny Pacquiao, Lone District of Sarangani Province.
“Resolution commending at the highest degree the Honorable Congressman and Pambansang Kamao Emmanuel D. Pacquiao for remarkably defending the WBO Welterweight Title in a 12-round tough fight and for once again bringing pride and honor to the Filipino nation and the Province of Sarangani”.
Namugna ang maong resolusyon gumikan kay malampuson nga gidepensahan ang bakos ni Cong. Pacquiao batok sa mehikanong si Juan Manuel Marquez.
 Garbo kaayo kang Congressman Pacquiao, kini nga resolusyon ihatag ngadto kaniya atul sa Hero's Welcome sa huwebes, Nov. 24, 2011. Dungan usab kini sa pag-abli sa 9th MunaTo Festival ang pagpresentar sa nasampit nga kopya sa aprubadong resolusyon ngadto kang Pacquiao.
Samtang pagkagabi-i niini, usa ka concert ang ipahigayon sa hawanan sa kapitolyo sa Sarangani nga pagapangunahan sa banda ni Pacman.
(Arnel Arsolon)

“Tumang kalipay ang atong
gibati”-BM Alzate

Sarangani Province-Tumang kalipay ang gibati ni Sarangani Board Member Eugene Alzate sa lain na usab nga kadaugan ang naangkon ni Sarangani Congressman Manny Pacquiao sa away niini batok kang Juan Manuel Marquez sa milabay'ng semana. Sa pakighinabi sa Abante Socsargen News kang BM Alzate gibutyag niini ang kadaugan ni Cong. Pacquiao mas makadugang pa sa iyang dedikasyon sa iyang pagpangalagad sa katawhan sa maong probinsya.
“Ang atong pinalangga nga kongresista si Congressman Manny Pacquiao sa laing higayon sa iyang pagmadaugon uban sa iyang panghinaut nga madugangan ang dedikasyon niini sa pagpangalagad sa katawhan sa lalawigan sa Sarangani”. Bagang duot sa katawhan sa Sarangani Province ang mopartisipar sa Heroes Welcome alang kang Cong. Pacquiao nga pagasugaton kini dinha sa Buayan Bridge nga diin maoy utlanan sa General Santos City ug probinsya sa Sarangani.
Gikadugang pa ni BM Saguiguit Chairperson sa Munato Festival nga ang mosakay sa Float ni Cong.Pacquiao si Sarangani Governor Migs Dominguez ug Vice Governor Steve Solon. Apil usab nga mopartisipar sa Heroes Welcome ang pito ka mayores sa probinsya sa Sarangani nga sila Mayor Alfonso Singcoy sa Malapatan, Mayor Corazon Grafilo sa Alabel, Mayor Bongbong Constantino sa Malungon, Mayor Danny Martinez sa Kiamba, Mayor Perret sa Maitum, Mayor Jose Zamorro sa Maasim ug Mayor Corazon Grafilo sa Alabel.
(Danny Bojos, Jr.)     

50% ng SP Ordinance
hindi naimplement - Kag. Lagare

SP GENSAN-Ubay-ubay matud pa ka mga ordinansa ang wala kaayo napatuman sa syudad sa Heneral Santos, kini ang gikumpirma ni Kag. Dominador S. Lagare III kaniadtong ika-68th Regular Session sa Sangguniang Panlungsod sa syudad sa Heneral Santos. Sumala pa sa nahisgutang kagawad  nga singkwenta porsyento matud pa ka mga ordinansa ang wala kaayo napatuman. “Well as we review it seguro mga 50 percent ng ating mga ordinance ang hindi naimplement ng maayos, pinaka common dito is 'yung ordinance na Non Smoking Policy.” pamahayag ni Hon. Lagare.  Dako usab matud pa ang tabang sa Codification Project sa 16th SP sa syudad tungod kay pinaagi niini nakita nila nga adunay mga ordinansang nangawala ug wala maimplementar. Dugang pa usab sa batan-ong magbabalaud nga legacy nila ang maong proyekto. Sa pikas bahin,  aminado usab si Kagawad Vivencio E. Dinopol ang chairman sa Committee on Infrastracture, sa nakitang obserbasyon ni Hon. Lagare. Sumala pa niini nga kinahanglan dugangan pa ang paglihok niini ilabi na sa Executive Branch aron mapatuman kun ma-implementar ug maayo ang gipangpanday niining mga balaud. “Additional gyud nga paglihok aron maimplementar gyud ang maong mga ordinansa.” ang pamahayag ni Hon. Dinopol.
 (Ed Angeles)