NEWS

Brgy. Bula, Kampeon sa Christmas
Booth Contest 

OVAL PLAZA, GENSAN- Nasakmit sa unang higayon sa Brgy. Bula ang 1st Prize sa Christmas Both Contest niadtong milabay'ng semana atul sa gipahigayong Kampeon ang Pasko sa GenSan 2011, kung hain nakadawat kini ug premyo nga P50,000. Ang maong pa contest gisalmutan sa 26 ka mga Barangay niining syudad kung hain adunay tagsa -tagsa nga gipangtukod nga mga payag nga napuno ug mga “Christmas Lights”dungan sa kasaulugan sa Pasko. Gipahigayon ang “Judging” niadtong petsa 9, 16 ug 23 matag gabii aron mamentinar ang pagpasiga sa mga suga matag gabii. Nakuha usab sa ang P30,000 sa Brgy. Apopong isip 2nd Prize, samtang P20,000 ang nadawat sa Brgy. Labangal nga anaa sa ikatulong pwesto. Gipasalamatan usab ni Kapitan Ceasar Vargas ang tanang misuporta sa Brgy. Bula hinungdan nga nakuha niini ang kadaugan. Samtang ang magbayaw nga si Ruel Pacquiao sa Brgy. Apopong ug Lorilie Pacquiao sa Brgy. Labangal, nagpasalamat sa gihapon sa mga empleyado ug mga constituents nga miayuda sa maong ginbuluhaton.
( Joemar Plasabas)

“I will fight for the continuation of gov’t.
Programs”- Rep. Fuentes

“I will fight for the continuation of government's programs that help the poor Filipino families to be empowered and self-reliant”, kini ang gibungat ni South Cotabato Representative Daisy Avance-Fuentes tali usab sa Converegence Caravan sa Pantawid Pamilya beneficiary sa T'boli, South Cotabato. Sigon pa sa kongresista nga nagtuo siya sa  long term perspective sa Pantawid Pamilyang Pilipino Program bisan pa nga nagpagawas sa ilahang paghagit  silang North Cotabato Representative Jesus Sacdalan ug Nancy Catamco nga tumanon ang kondisyones sa programa pinaagi sa regular nga health check up ug pagsiguro sa mga anak sa benepisaryo nga makatungha sa mga eskwelahan. “I hope that the beneficiaries will continue the practice of prioritizing health and education even after the 5-year program,” kini ang gibungat ni Congressman Sacdalan. Nagtuo usab si Sultan Kudarat Representative Arnulfo Go nga ang stratehiya nga gimuntar sa Department of Social Welfare and Development sa 4Ps program usa ka maayong lihok aron sa epektibong pagtunol sa mga basic services sa mga kabos ug komunidad nga napailalom sa programang 4ps. Kahinumdaman nga bisan si Sarangani Congressman Emmanuel Pacquiao usa usab ka advocate sa DSWD poverty reduction programs nga Pantawid Pampamilyang Pilipino Program, KALAHI-CIDSS ug Sustainable  Livelihood human kini misuporta sa strategic Plans sa convergence program sa DSWD.
(Rhea M. Dela Cruz)

73-M Munisipyo sa Maasim sugdan na!

Maasim, Sarangani Province- Gikatakda nga sugdan na ang paggambalay sa nasunog nga munisipyo sa Maasim sa dili madugay sa kantidad nga 73 milyones pesos.
Sa pakighinabi kang Maasim Mayor Jose Zamorro gibutyag niini nga madayon na ang pag-konstrak sa munisipyo nga nasunog sa milabay'ng tuig nga bag-o pa lamang nahuman ang piniliay.
“Tinood nga ako nang pasugdan ang pagconstract ang munisipyo sa Maasim nagpadala nako ug letter sa buhatan sa DPWH Sarangani nga Go na ang construction bali i-preserve lang ang burned area aron wala  koy tubagonon, ang akong gihimo giabante sa atubangan kay dako pa man kaayo ang lugar”,pintok nga pamahayag ni Mayor.
Dugang niini ang pundo nga 3 milyones gikan kang Senator Jinggoy Estrada ubos sa pagpaningkamot ni Sarangani Vice Governor Steve Solon, mao ang unang gigamit alang sa pagsugod sa gambalay ug ang kulang pangitaan pa ug pamaagi aron kini mahuman.
Hinoon duna usay gisaad nga tabang pinansyal  si Sarangani Congressman Manny Pacquiao aron paghuman sa munisipyo sa Maasim.
(Danny Bojos, Jr.)  

Gambalay sa ALS Alabel,  tukuron  

Alabel Sarangani Province- Hayan matukod na gayod sa 2012 ang gambalay sa Alternative Learning System (ALS).Kini ang   pamahayag ni Vice Mayor Vic Paul Salarda atul  sa gipahigayong graduation   kaniadtong nakalabay nga mga semana.
Ang maong proyekyo ila kining paningkamutan nga magahinan sa PDAF(Priority Devt. Assistant Fund) ni Cong.Emmanuel  Pacqiao sa sunod tuig.Sa kasamtangan walay kaugalingong lawak tulonghaan ang Alternative Learning System. Ang mga magtutungha niini mao kadtong wala makahuman sa high school ug igo lang nakahuman sa elementarya sa walay pag pilili sa edad, minyo kaman ug bisan nangapo na basta intresado kalang mutungha.Gituyo kini sa pag mugna ang ALS sa Department of Education(DepEd) aron katong gustong mupadayon sa  pagtungha nga walay ikabayad sa tulong haan makahuman sa pagtungha sa  high school. Libre ang maong pagtungha sa sulod sa usa ka tuig ug pagkahuman mahimo kanang mutongha sa kolehiyo sa sunod tuig.Dako usab ang kalipay ni Mr. Reynold Paniares ALS East District Coordinator nga maoy naningkamot aron sa pagtudlo sa mga magtutungha kauban nga si Mr. Ramer Pingoy.Sa kasamtangan adunanay 200 na ang nakalampos sa pagtungha Alternative Learning System sa lungsod sa Alabel.                                                                 
(Arman Chavez Rabia)

Mga Arsobispo nagpabiling supak
sa Mining!

Saint Peter & Paul Parish- Hugot ang baruganan sa mga Arsobispo sa Kidapawan, Marbel ug Digos Diocese nga silang Most Rev. Romulo dela Cruz D.D, diocese sa Marbel si Rev. Dunualdo Gutierrez D.D ug sa Digos nga si Rev. Jimmy Affable D.D may kalabutan sa ilang gina dusong pagbabag sa XTRATA/SMI-Tampakan Copper and Gold Project.  Usa sa mga rason niini tungod makadaot matud pa kini sa kinaiyahan ug mas kalulu-oy usab ang mga mosunod nga henerasyon. Ang mga benepisyong ginahatag sa Mining Company sa mga kaigsuonang lumad dili matud pa makakumbinsi sa simbahang katoliko sa pag uyon sa maong kalihukan. Sumala pa ni Rev. dela Cruz dili igo ang maong benepisyo tandi sa kadaut nga dala niini sa kumunidad ug sa kinaiyahan nga gihimo sa labaw nga makagagahum sa tanan. Sa pikas bahin dismayado ang mga Arsobispo tungod sa wala paghatag ug aksyon ni Pangulong Benigno Aquino sa petisyon nga ilang giduso ngadto sa Malakanyang apan malaumon gihapon ang mga nahisgutan nga mahatagan kini ug higayon aron dunggon ang maong petisyon. Kahibaluan nga pipila na usab ka mga organisasyon ang nagpahihayon ug lihok protesta aron sa pag babag sa maong proyekto samtang aduna usay mga grupong lumad ang uyon niini.
(Manz Virtudazo)

Unsaon pagbaton ug Healthy New Year…

Sa dihang muentrada pa lamang ang bulan sa Disyembre magasugod na usab ang mga nagkadaiyang, party,  kaon diri kaon didto ug labaw sa tanan ang pag-inom. Sagad kanato ang madala lang sa gitawag nga yuletide season spirits hinungdan nga ato nang makalimtan nga ang susamang mga aktibidad ang makahatag ug dakong epekto sa atong kalawasan.  Ato na usab nga himoong rason nga nakisabay kita sa atong mga higala tungod kay kini mahitabo lamang kausa sa usa katuig busa walay balibaray. Apan bisan pa man niini kinahanglan usab nga taga-an nato ug pagtagad ang pipila ka mga kausabang mahitabo kung kita magpatuyang atul sa kapaskuhan. Sama na lamang sa pagsuta sa mga pamaagi aron dili madugangan ang timbang, paglikay sa food poisoning, ug ingon na sa pamaagi alang sa sensitibong drinking session ka-uban sa mga kahigalaan.
Gibutyag sa British Dietetic Association nga ang average nga makuhang calories sa tawo atul sa adlaw sa pasko ug sa pagsugat sa ba-ong tuig ang muabot ngadto sa 6,000 calories, kung diin sagad magsugod kini atul sa pasko ug mulongtad kini hangtud sa pagsugat sa bag-ong tuig.  Gibanabana nga musaka ngadto sa tag duha ka kilo ang idugang sa timbang sa usaka indibidwal sulod lamang sa pipila ka adlaw.  Matud pa sa mga researchers nga ang ilang gihimong pagtuon ang wala lamang misentro sa hisgutan ang kung pila ang nadugang nga calories sa usaka tawo apan gihisgutan usab kung sa unsang paagi nga mawagtang sa mas madaling panahon ang nadugang nga calories sa lawas.
Aron mamintina ang himsog nga kalawasan bisan giabusaran pinaagi sa sobrang kaon, inom ug pulaw, kinahanglan nga mag-gahin ug oras alang sa brisk walk sulod sa kinse ka minutos. Likayan ang pagkaon atubangan sa telebisyon tungod kay samtang nalingaw ka ug lantaw sa salida malingaw ka usab ug kaon.  Mukaon lang kung gutumon ayaw ug kaon tungod kay ana-a sa imong atubangan ang mga pagkaon. Ayaw ug pungko sa mga lamesa nga gikabutangan sa mga pagkaon aron kalikayan ang tintasyon. Hinay-hinay sa pagkaon, hinumdumi nga mulungtad pa sa kinse ka minutos ang pagkadelatar una muhatag ug senysalis ang tiyan ngadto sa utok nga ikaw nabusog na. Ayaw pagutom tungod kay muresulta kini sa dakong kaon nga imong pagahimoon.  Ang pagpagutom ang matud pa makahatag ug kalibog sa atong appetite rhythm hinungdan nga mas daghan ang makaon itandi sa naandan na nga ginakaon.  Kinahanglang adunay kaonon bisan gamay una muadto sa usa ka party, batasanon ang pagbalibad kung adunay idalit nga pagkaon, dili na kinahanglan nga hutdon gyud ang tanang gibutang sa plato aron lang malipay ang nagpasiugda sa maong party. Likayan usab ang pagkaon kung kamo gikapoy o kaha adunay suliran kung gusto gyud ninyong mukaon I divert kini pinaagi sa uban pang mga aktibidades. (Venus C.)