HEAD NEWS

Biktima sa Bagyong SENDONG
 gitabangan ni Congressman!

Cagayan de Oro City-Tumang kalipay ang gibati sa mga taga Cagayan ug Iligan nga nabiktima sa bagyong Sendong  human personal nga gipaabot ni Pound for Pound King ug Sarangani Congressman Manny Pacquiao ang tabang niini kauban ang kapikas nga si Jinkee Pacquiao niadtong Disyembre 23, 2011. Mukabat sa 1 milyon pesos ang gigahin nga tabang sa kongresista gikan sa Priority Development Assistance Funds (PDAF) niini alang sa libuan ka mga pamilya nga naapektuhan sa bagyo. Sumala pa ni Atty. Franklin Gacal, legal adviser sa kongresista nga gituman matud pa ni Cong. Pacquiao ang gipanawagan ni House Speaker Feliciano Belmonte nga kinahanglan mugahin ug 1 milyon ang mga kongresista sa nasud isip tabang sa mga nabiktima sa bagyong Sendong. “The situation needs an immediate national response. We have decided to give our all-out efforts, not just as an institution but as individuals.” Pamahayag ni Belmonte.  Luyo sa PDAF ni Cong. Pacquiao adunay  relief goods, mga ginamit nga mga sinina ug libuan ka mga bottled mineral water ang gipanghatag. Kahinumduman nga gi-atake sa bagyong Sendong ang Cagayan ug Iligan niadtong milabayng mga semana kung diin mukabat sa libuan ka sibilyan ang namatay ug nangawala sa maong panghitabo. Gikasubo usab sa mag-asawang Pacquiao ang maong panghitabo human nagsaulog sa kapaskuhan nga walay panimalay ug nawad-an ug minahal sa kinabuhi ang pipila sa mga Cagayanos. “I am expressing my deepest sympathy to the victims and their families. Let us pray for all their loved ones.” Pamahayag ni Cong. Pacquaio.
(Kathy Kasayan)

2, Bomba nakaplagan sa Polomolok

Polomolok South Cotabato- Nakaplagan gawas sa Poblacion Polomolok National High School ang duha ka Improvised Explosive Device (IED) niadtong Disyembre 26 tuig kasamtangan. Miresponde ang mga kapulisan nga gipangunahan ni PSUPT Fernando Fortes human mipataho ang gwardya nga naka destino sa maong tulunghaan nga si Masdal Abdul. Nadiskubrehan nga kumpleto sa elemento  ang duha ka IED nga gibutang sa sako ang nasangpit ug gitanom sa susama nga lugar pasado alas 10 ang takna sa buntag. Kahibaluan nga mga residente sa R. Zarte St. ang mitug-an sa maong gwardiya may kalabutan sa sako nga gibilin sa landscape atubangan sa nasangpit nga tulunghaan sa wala mailhing suspetsado. Ang unang Improvised Explosive Device adunay 31MM CTG ug  ang ika duha adunay 2 rounds 31MM CTG, Samsung Cellphone CMM, 3 Chengyuan, 9V Energizer BAT ug 2 Relays PD ug hinungdan nga gidali sa mga kapulisan ang pag detonate sa maong IED. Wala pa masayri sa pagkakaron ug unsang motibo sa maong pag tanom sa maong bomba  ug padayon pa ang gihimong imbestigasyon sa mga kapulisan.
(Manz Virtudazo)