Krusada batok Human
Trafficking gipalig-on!

Sarangani Prov.- Gipalig on ang krusada batok sa Human Trafficking sa probinsya sa Sarangani. Usa ka  sa Provincial  Inter  agency Committee Against Trafficking PIACA, isip sub- committee sa Provincial Gender and Development Council PGADC, kung asa  naghiusa ang duruha ka ahensya sa pakigbisog ug paghatag sa serbisyo sa mga nabiktima sa “human trafficking.”
Nahilakip sa maong komitiba mao anga PNP, NBI, PDEA, LGUs/ GOs ug mga NGOs . Unang gihatagan  niini ug gibug- aton mao  ang pagpalig on sa tawhanong katungod,isip  adbokasiya  ug ang paghatag ug  “Help Lines” sa kasayuran usab sa maong krimen kung hain mga mabiktima niini pinaagi sa sex slavery, illegal recruitment ug paghilambigit sa illegal nga druga.
Sumala pa ni Hon.BM Eleanor Saguiguit nga adunay igahing pundo nga P7 milyon ang Provincial Government sa pito ka munisipyo alang sa mga kababayen -an aron mahatagan ug igong pagtagad ang maong problema ug aron dili ang kalisdanan maoy mamahimong rason sa maong kalapasan.
Kahinumduman  nga si Congressman Manny Pacquiao sa Sarangani, miduso ug balaudnon may kabahin sa “human trafficking.”
(Joemar Plasabas)

Pangayaw ni Daguil Capion dili
para sa tribu-Pangilan

Gipahayag ni Sarangani Provincial Tribal Chieftain Edmund Pangilan nga posible nga personal ang katuyuan sa pagdeklara ni Daguil Capion, usa ka nitibong B'laan sa Bong Mal, Davao del Sur ug dili pakigbisog para sa tribo.  Matud pa ni Pangilan nga dunay problema sa ilang pamilya ug naghinaut siya nga dili maapil ang mga yanong sibilyan kay dili man tanang tribu ang naapil sa iyang pangayaw. Gikanayon usab sa usa ka lider nga nakabase sa Davao del Sur nga si Josephine Malid nga personal ni Capion ang pagdeklara niya ug pangayaw ug dili para sa tribu. Duna sa'y gipangayo si Capion sa kumpanya sa Saguittarius Mines Inc. (SMI) nga wala mahatag hinungdan nga ninghimo siya ug kasamok sa bukid. Gikondena usab kini sa mga lider sa tribu ang gihimo ni Capion tungod kay siya ang naghimo ug kasamok sa ilang lugar. Atul sa usa ka press conference nga gipahigayon sa mga lider sa tribu ilang gipakita ang ilang suporta sa Tampakan Copper Gold Project gumikan kay sila mismo nga mga tribu sa lugar nakabenipisyo susama na lang sa scholarship ug mga maayong dalan padulong sa bukid, ug ning-uswag usab ilang panginabuhi-an.
(Arnel Arsolon)

16 anyos  gikadena sa anak
sa kanhi Gobernador

MALALAS PNP-Bun-og ang kalawasan nga duna pa'y kadena nga naka hikot sa liog nga nagpa-tala sa presinto kwatro ang usa ka dise-sais anyos nga batang lalaki human kini maka ikyas sa pag kulata ug pag gaid sa usa ka nanagiya ug internet shop nga gi trabahuan sulod sa dose -oras. Kahibaluan nga usa ka call-in technician si alyas “Dodo”(menor de-edad)sa usa ka internet shop nga nahimutang sa Aparente St. Purok Malakas ning dakbayan nga gi panag-iyahan ni Julius Escobar sa Brgy. City Heights, Gensan ug sumala pa anak sa kanhi gobernador sa Sarangani Province nga  gituohang mikulata ug migapos human nadiskobrehan nga dunay nawalang piyesa sa usa ka computer unit nga gipaayo niini sa biktima.
Sumala pa kay PSI Lorenzo Henarez Chief of Police sa maong istasyon nga niadtong Disyembre 10 sa gabii nahitabo ang pagkadena ug pagkulata sa biktima. Nakahigayon sa pag-ikyas ang biktima alas 9:00 sa buntag sa Disyembre 11 ug gilayung nangayo ug tabang sa kapulisan.
Sa kasamtangan padayun pang ginasuta sa kapulisan ang maong panghitabo. Sa pikas bahin posibleng mag atubang ug kasong Child Abuse Ug Serious Illegal Detention  ang suspek.Samtang  abli usab ang buhatan sa  ABANTE SOCSARGEN NEWS nga makuhaan ug tubag ang nahisgutang suspetsado may kabahin sa alegasyon nga gipasangil kaniya.
(Dave Silagan/Manz Virtudazo)

5.4-M damyos sa higanteng balud! 

Maasim, Sarangani Province- Mukabat sa 5.4  milyones pesos ang kantidad sa damyos human kalit miabot ang dagkong balud sa kadagatan sa Maasim tungod sa hinungaw sa bagyo sa maong lugar sa milabay'ng semana.
Gibutyag ni Ronald L. Orbita, Municipal Disaster Risk Reduction and Management Office, Officer (MDRRM) sa maong lungsod nga adunay 66 ka mananagat ang nawad-an ug kapanginabuhian tungod sa mga bangka nga nangalunod samtang sila nanagat ug ang uban nga anaa sa daplin sa baybay ang ilang mga bangka nangaguba tungod sa dagkong balud nga mihapak sa nagkadaiyang baybay sa maong lugar Barangay Kamanga, Malbang, Colon, Poblacion Maasim, Kabatiol, Kablacan, Daliao, Lumatil, Kanalo, Lumatil, ug Barangay Lumasal.
Duha ang nakabsan sa kinabuhi nga nailang   silang Seperiano Dela Cruz, residente sa Poblacion Maasim, ug Eliseo Toile, Sr., 62 anyos, residente sa Kablacan sa maong lungsod, sa taho samtang nanagat kining duha ka biktima kalit nalang gikuso-kuso sa dagkong balud ug nalunod ang mga bangka niini ug hinungdan sa hinanaling kamatayon ug ang gikataho nga mga missing nga mananagat nakauli na kini pinaagi sa paglangoy hangtud nakaabot sa daplin. 
Gikadugang usab ni Mayor Jose Zamorro nga kalit kaayo ang maong hitabo sa hilabihan kadagko sa balud ang nasinatian sa nagkadaiyang kabaybayonan sa ilang barangay miresulta kini sa 5.4 milyones pesos  nga  danyos.
Hinoon dugang pa niini nahatagan na ug hinanaling pagtagad sa lokal nga kagamhanan ang mga pamilya nga naapektuhan sa maong hitabo.
(Danny Bojos, Jr.)        

Kape makatabang sa Cancer

Angay nga magmaya ang mga tawong mahilig sa pag inom ug kape, tungod kay sa bag-ong  pagtuon nga gipahigayon sa Cancer Epidemiology, Biomarkers & Prevention nga nakabase sa Amerika nga kadtong tawong mukonsumo ug upat ka tasa sa kape matag adlaw ang adunay baynte singkong porsentong ubos sa risgong makabaton ug endormetrial cancer,(cancer of uterine) . kini tungod matud pa sa antioxidant properties nga ana-a sa kape.
Gibutyag usab ni Edward Giovannucci, M.D., Sc.D.,usa ka professor ug researchers  nagbutyag nga ang kape ang nagsilbing protective agent sa cancer  nga adunay kalambigitan sa obesity, estrogen ug insulin. Nasayran nga una na usab nga nakitaan sa mga eksperto nga ang kape ang nagsilbing protective agent batuk sa diabetes kini tungod sa epekto niini sa insulin.
Adunay 70,000 ka kababaihan ang nagpa enroll sa Nurses' Health Study, sulod sa baynte- sais ka tuig nga pag dukomento migawas nga 672 niini ang adunay endometrial cancer, migawas nga kadtong miinom ug kape upat ka tasa sulod sa upat ka adlaw ang mikunhod ang risgong makabaton ug susamang balatian ngadto sa baynte singko porsento samtang syete porsento usab ang pag-ubos sa tawong miinom ug duha ngadto na sa tulo ka tasa nga kape matag adlaw.
Nasuta usab nga coffee ang adunay daghang antioxidants kung itandi sa mga gulay ug sa mga prutas. (Venus C)