kagahapon ug karun

Asawang Maluibon,Nangabit
Katapusang sumpay.....

 

 

 

 

GIAGWANTA nako ang tanan tungod sa akong dakong gugma ngadto kang Rena, ug aron nga maundang na ang among suliran nakahukom ako nga manarbaho na lamang ug aron nga malikayan nako ang pagsud-ong sa iyang nawong nga magul-anon, mihangyo ako sa akong inahan nga tabangan ako nga makatrabaho gawas sa nasud. Tuod man dali ra kaayo miuyon ang akong giniknan, walay pagbabag ang akong asawa butang nga gikasakit ko pag-ayo tungod kay mas pabor pa diay siya nga magkalayo kami aron lang nga matuman ang iyang gusto nga mao makabaton ako ug  trabaho . Mipasalig ang akong inahan nga sulod lamang sa duha ka tuig mamahimo ko nang mapetisyunan ang akong asawa ug duha ka anak paadto sa Canada, nga maoy akong gikahinaman.
Tumang kamingaw ang akong gisagubang sa  Canada, kamingaw sa akong asawa ug anak, matag adlaw ako nagatawag sa akong pamilya apan ang kanunay lamang nakong mahinabi sa telepono mao lamang ang duha ka ka mga anak , igo lang muingon ug kumusta ang akong asawa kanako ug iya gilayong ihatag ang telepono sa akong anak.Makapila ka higayon nga buot kung mupauli sa Pilipinas aron makauban ang akong pamilya.
Mas mibug-at ang akong dughan Ate Venz sa dihang usa ka adlaw niana duna akoy nadawat  nga sulat gikan sa akong asawa, kalipay ang una kung gibati apan sa dihang akong gibasa ang unod niini didto na mianam ug dagayday ang mga luha sa akong duha ka mata tungod sa akong nabasa. Nangayo ug pasaylo si Rena ug buot na niining makigbulag kanako,buot matud pa niyang maangkon  ang kagawasan.dili matud pa ako mabalaka tungod kay iyang ibilin ang duha ka bata sa ako-a.Wala ako nakatulog sukad nga akong nadawat ang maong sulat, wala usab ako mitawag kang Rena aron sa ingon magtuo kini nga wala nako nadawat ang iyang sulat. Bisan ang akong inahan ug amahan nakamatikod sa pag usab sa akong mga nilihukan, namayat ako ug wala na kaayoy gana sa tanan.Giantus ko sa pag-human ang duha ko ka tuig nga kontrata sa akong trabaho una ako mipauli . Walay ni isa sa akong mga kabanay sa Pilipinas ang nasayod sa akong pag uli buot ko silang sorpresahon ilabi na ang akong  asawa bisan pa nga dunay sagol kakulba ang  akong gibati.
Sa akong gilauman duna nay kausaban ang tanan tungod kay ang magul-anong si Rena ang duna nay malipayong panagway ug kini tungod sa iyang nakaplagang bag-ong gugma. Sa akong pagpaniid sulod sa tulo ka adlaw, akong nasuta nga dunay lalaking ginapakigkitaan si Rena. Sa kahadlok ko nga akong mapamatud an ug akong madunggan ang sakit nga kamatuoran wala na nako siya gikomprontahi ug misaad sa kaugalingon nga andam nako siyang pasayluon ug ako gihapon siyang dawaton. Murag ni ngit ngit ang akong panan-aw sa dihang akong nasaksihan ang usa ka hugna nga dili angayan nga akong makita. Dali dali silang naka sulod sa usa ka “lodge” apan wala sila maka matikod nga naka kita ako kanila. Sa tabang sa akong higala nga tag-iya sa maong lodge nahatagan ako higayon nga masundan sila sa lawak .Naka sulod ako tapad sa maong lawak diin bungbong lamang ang tabil sa among nahimutangan. Madunggan nako ang ilang mga agulo ug kasikas. Dili matukib ang ilang kalipay samtang nagtagbaw sa ilang kahigal sa matag usa.
Tampalasan sila ate Venz napamatud-an gyud nako ang kahugaw sa akong asawa niadtong higayuna. Naghilak ako nga nagpaabot sa ilang pagkatagbaw. Sa higayong nahilom na sila, ako silang gi sorpresa pagsulod. Murag naka kita ug multo ang akong asawa sa iyang pagka kurat nga anaa na ako sa ilang tiilan samtang nag gakos sila nga walay mga sapot.  BIsan pa man sa maong sitwasyon ug akong nasaksihan wala koy gihimong pagpasakit kanilang duha gani maayo pa gihapon ug kalmado ang akong tingog sa ako na silang gi-sudyaan. Gipagawas nako ang akong kahiubos sa akong asawa apan sa dako nakong gugma kaniya dili siya maka tuo nga ako na lang gipasagdan ang tanan ug gipalakaw ang lalake. Naulaw kaayo nako ang akong asawa sa iyang gihimo samtang nangayo kanako ug pasaylo niadtong tungura. Sama sa akong gisaad sa akong kaugalingon gipasaylo nako ang akong asawa ug gidawat gihapon nako siya. Didto nako napamatud-an nga hilabihan gyud diay ang akong gugma kaniya. Akong gihangyo ang akong asawa nga kalimtan na namo ang tanan ug mag sugod kami sa bag-o namong kinabuhi. Hangtud karon nag-uban kami dili gihapon mawala ang akong kahadlok nga basin ug usbon sa akong asawa ang iyang gihimo kanako. Matud pa sa uban nga nakasayod sa akong gidangatan talagsaon kuno kaayo ang akong gihimo apan alang nako usa lamang ako ka binuhat nga nahigugma pag-ayo sa akong asawa. Andam nga magpaka buta bungol alang sa akong sa usa ka asawang maluibon.

Inyong Magtatampo

Maiko